Jógvan Fríðriksson, bispur, fegnast um, at tað nú aftur fer at bera til at fáa fleiri fólk í kirkju, nú slakað verður í koronutilmælunum.
Tað segði hann við Deg og viku í kvøld.
– Hetta fer at gera stóran mun hjá kirkjuni, og vit fáa rímuliga normal viðurskifti aftur í kirkjuni og fáa fleiri fólk í kirkju, segði hann.
Við nýggju tilmælunum, at tað kunnu savnast upp til 200 fólk í skipaðum samkomum, fer at bera til at halda konfirmatiónir, næstan sum áður.
– Hetta ger allan munin, segði bispur við sjónvarpið.
– Bæði hjá presti at leggja upp til, at konfirmantarnir fáa ein góðan dag saman við sínum avvarðandi, og at vit fáa yvirhildið tær skipanir, sum eru við frástøðu og reinføri.
– Ja, hetta er frálíkt, segði hann.
Bispur sigur, at hetta hevur verið eitt drúgt tíðarskeið hjá øllum, men at tey í kirkjuni eru takksom fyri, at tað hevur gingið so væl.
– Nú vóna vit, at einki kemur aftur av hesum, og at vit skjótt gloyma tað, sum farið er.
– Tað fer at líkjast sær sjálvum aftur við konfirmatiónum – eftir skipaðum viðurskiftum, kanska ikki ordiliga sum vanligt, men fram ímóti, segði bispur.
Kirkjan fer at koma út við boðum um konfirmatiónir, kanska um vikuskiftið.
