Reyði Krossur Føroya ætlar sær at hjálpa neyðstøddum bæði í Føroyum og í sínum heimlandi. Tey fara ikki at spyrja eftir átrúnaðarligari sannføring ella uppruna.
- Vit skulu hjálpa øllum neyðstøddum, óansæð bakgrund.
Tað sigur formaðurin í Reyða Krossi, eftir at nevndin var á fundi mánadagin. Upprunaliga skuldu tey taka eina felagsstøðu til spurningin um flóttafólk hósdagin í farnu viku, men ringa veðrið forðaði hesum.
- Felagsstøðan er tann, at vit eru sinnað at taka í móti flóttafólkum uttan mun til teirra átrúnaðarligu bakgrund, umframt at vit halda áfram við tí menningarhjálp, sum vit frammandundan veita, sigur Hjalti í Jákupsstovu.
- Tað ber ikki til at seta fram religiøs kriterii fyri neyðstøddum. Men tá tað er sagt, so er framvegis tørvur á einari størri tilbúgving í Føroyum, bæði við lóggávum og serkønum, áðrenn vit eru til reiðar at taka í móti flóttafólki, sigur hann.
Formaðurin heldur, at við avmarkaðu føroysku fíggjarkørmunum og fólkatalinum, átti politiska valdi at fingið sær íblástur úr Íslandi, hvørjum leiðreglum viðvíkur.
- Koma flóttafólk, er sannlíkt, at tey hava tørv á tulkum, sum er ein sera dýr tænasta. Í Íslandi hava avmarkað seg nøkur ávís mál, soleiðis, at tørvurin á fjølmæltum tulkum ikki verður ein fíggjarlig forðing fyri neyðhjálp, sigur Hjalti.
