Tað er lítil og eingin ivi um, at FM-finalan í føroyskum kvinnuhondbólti skal standa millum VÍF og Kyndil.
Neistin og VB hava roynt at elt tey bæði oddaliðini, men í avgerandi dystunum hava tey bæði oddaliðini verið somikið sannførandi, at finaluspurningurin nú mest av øllum líkist einum støddfrøðisuppgáva í sannlíkindarokning.
Skal nakar sum helst spenningur vera um spurningin, so skal VB hava stig í Vestmanna í dag. Mett eftir uppgerðunum, sum liðini hava spælt í vetur, so er VÍF tó greiður favorittur, og við sigri kunnu tær altso sementera sína luttøku í FM-finaluni.
Í Havn verður dystur millum Neistan og Stjørnuna. Neistin fekk í miðvikuni tvey stig móti Kyndli, og tí halda tær fast í evarska lítlu vónini um finalupláss. Tí ræður um hjá teimum at røkja sín setning, og so annars vóna, at oddaliðini snáva.
Báðir dystirnir í Elektron-deildini byrja klokkan 14.30.
