Tað kunnu vit bara harmast um og vóna, at hasi fólkini skjótt leggja frá sær, ella at landsstýrismaðurin í mentamálum sjálvur vaknar. Í síðsta enda er tað hann, sum hevur ábyrgdina av niðurbræðingini, sum stovnurin er í ferð við.
Í hesum døgum liggur eitt mál á tingborði, sum kann hjálpa upp á fíggjarliga trupulleikan hjá Kringvarpinum – og privatu miðlunum. Tað er uppskotið um at taka rættin at selja lýsingar frá Kringvarpinum, at frítaka kringvarpsgjaldið fyri mvg, so stovnurin fær um 11 milliónir meira í kassa, uttan at kringvarpsgjaldarin rindar meira í kringvarpsgjaldi.
Men hetta uppskot ætla samgongufólkini at fella, hóast Bjørn Kalsø, landsstýrismaður, hevur nevnt somu loysn í einum skrivi til fíggjarnevndina.
Men av tí at talan er um eitt andstøðuuppskot, so skal tað bara fellast. Soleiðis arbeiða samgongur í Føroyum.
Trupulleikin hjá privatu miðlunum verður tí bara tað størri. Tí nú skal uttan iva ganga í minsta lagi eitt ár, til Bjørn Kalsø kemur við sínari loysn, sum helst verður lík hesari.
Men so skal Fólkaflokkurin helst skava eitt sindur bruturav, so Kringvarpið ikki fær alt mvg'ið...
Sum tíðin gongur, viknar trúvirði hjá Kringvarpinum. Stovnurin missir sína støðu sum public service rás, tí alt er til sølu.
Um eitt ár verður kravið helst at lata stovnin sigla sín egna sjógv, og at kringvarpsgjaldið verður avtikið. Politiskur gróðrarbotnur er í tinginum fyri hesum ráki – sum kringvarpsleiðslan so íðin kyndir undir við sínum út av lagi vánaliga public service leiðsluhátti.
