Valstríðið til fólkatingsvalið í Kringvarpinum er avmarkað. Har sleppa flokkarnir fram at tríggjar ferðir í sjónvarpi og tvær ferðir í útvarpi.
– Vit hava ikki ráð at gera fleiri sjónvarpssendingar í sambandi við fólkatingsvalið, og vit hava als ikki ráð at skipa fyri stórum stjónvarpsfundi í Norðurlandahúsinum.
Tað sigur Liljan Weihe, tíðindaleiðari í Kringvarpinum. Fleiri politikarar hava verið firtnir um, at sendingarnar í Kringvarpinum eru so avmarkaðar – og um kravið um, at floksformaðurin skal vera við, og at annað valevni í sjónvarpinum bert sleppur fram at í andglettinum. Tað ber til dømis ikki til hjá formanninum at at lata annað valevni sleppa framat. Tí mugu til dømis Javnaðarflokkurin og Sambandsflokkurin møta upp við fólkatingsmanninum og formanninum.
– Men hetta er leisturin, vit hava valt – og sum allir flokkarnir hava góðkent, uttan Fólkaflokkurin, sum ikki møtti upp, sigur Liljan Weihe.
Tað eru Bogi Godtfred og Beinta Løwe, sum skiftast um at vera vertir í Andglettinum. Tey hava fýra sendingar í part. Fyrstur var Javnaðarflokkurin, sum var í andgletti hóskvøldið, og í gjárkvøldið var túrurin hjá Tjóðveldinum. Fyri at spara verða sendingarnar lagdar eftir Deg og Viku, og tí verða sendingarnar bara tey kvøldini, tá Dagur og Vika er á skránni.
Seks sendingar eru eftir:
Mánadagin 8. juni: Miðflokkurin
Týsdagin 9. juni: Sjálvstýrisflokkurin
Hósdagin 11. juni: Zakarias Wang
Fríggjadagin 12. juni: Sambandsflokkurin
Mánadagin 15. juni: Fólkaflokkurin
Týsdagin 16. juni: Framsókn
Sendingarnar verða endursendar í útvarpinum klokkan 11 dagin eftir. Tó verður sendingin fríggjakvøld send í útvarpinum mánadagin eftir.
Kl. 12.35 viðger eitt miðlapanel Andglettin frá gerandisdegnum fyri. Útvarpsredaktørurin er vertur.
Umframt hesar valsendingar, verður Radarin mikudagar eisini nýttur til fólkatingsvalið næstu tveir mikudagarnar fram til valið hósdagin 18. juni. Radararnir mikudagin 10. juni og mikudagin 17. juni eru settir av til politiskt orðaskifti. Brynhild Thomsen er vertur. Radarin verður endursendur í útvarpinum hósdag kl. 11, tó ikki valdagin.
Dagin fyri valið, mikudagin 17. juni, verður formansumfar í sjónvarpinum, og valdagin 18. juni verður valkvøld í Kringvarpinum, sum endar við formansumfari.
Í brævi, sum Liljan Weihe hevur sent flokkunum sigur hon soleiðis:
– Sum eg havi kunnað flestu tykkara um, so er játtanin til fólkatingsvalið avmarkað, tí vit hava valt at raðfesta løgtingsvalið hægri enn fólkatingsvalið. Tað merkir færri valsendingar og harvið eisini færri valevni, sum sleppa til orðanna í sambandi við fólkatingsvalið.
– Tit eru politikkarar og kenna alt til at býta avmarkað tilfeingi, so eg gangi út frá, at tit eisini skilja mína støðu í hesu raðfesting, sigur hon.
