Aksel V. Johannesen mælir í grein her í blaðnum dag til, at løgtingið ásetir ein kringvarpsskatt, ið eins og kirkjuskatturin er leysur av fíggjarlógini – ein skattur, sum politikararnir ikki skulu taka støðu til á hvørjum ári.
Sambært uppskotinum verður gjaldið 0,7 prosent fyri hvønn skattgjaldara. Á henda hátt fær Kringvarpið 60 milliónir um árið. Ein stakur pensjónistur rindar tá 450 krónur um árið móti 3.625. Ein við inntøku upp á 300.000 rindar 2.100 og tann við eini inntøku upp á eina millión rindar tá 7.000 í kringvarpsgjaldi um árið.
Ein slíkur háttur hevði í øllum førum verið ein loysn. Høgni Hoydal tosar eisini um eina loysn við at fáa kringvarpsgjaldið um skattin, og formaðurin í Mentanarnevnd løgtingsins, Bjarni Djurholm tosar eisini um eina loysn uttan spøl og lýsingar.
Og tað ber til at fáa eina slíka loysn longu frá nýggjárinum, um slíkt uppskot kemur í tingið.
Soleiðis fær Kringvarpið eitt trygt fíggjarligt grundarlag. Men tað er av alstórum týdningini, at handilslýsingar fara burtur úr Kringvarpinum. Vit hava longu sæð, hvussu stóran skaða handilslýsingarnar hava gjørt bæði Kringvarpinum – og hinum miðlunum, sum missa inntøkur av ójøvnu kappingini frá Kringvarpinum.
At Kringvarpið hevur brúkt so nógva orku til at leggja sína skrá yvir skránna hjá Rás2 fyri at halda lurtarunum til Kringvarpið – soleiðis at Kringvarpið kann »halda upp á lurtararnar« og selja fleiri lýsingar er prógv um, hvussu tápuligt tað er at fíggja eitt alment public service kringvarp á henda hátt.
Men tað krevur sjálvandi, at Kringvarpið verður stýrt við ábyrgd. Tað er tað so ikki seinastu árini. Kringvarpsstýrið hevur sína stóru ábyrgd. Gamla leiðslan hevur sína stóru ábrygd. Nýggi stjórin er sjálvandi gyrdur í brøkur, men hann steðgaði ikki á, meðan tíð var. Sparitiltøkini, sum nú verða sett í verk eru armóðstekin.
Tá kringvarpsleiðslan í óðum verkum vil siga 30 fólkum – ella øllum – úr starvi, so er okkurt sum bendir á, at leiðslan vil rudda upp. Kanska eru tað fólk, sum leiðslan vil sleppa av við. Gamlir vanar sum gera, at summi sleppa at gera minni til nyttu enn onnur. Slíkir óvanar búnast í vikrjum við vánaligari leiðslu.
Men øll eru tó góð við Kringvarpið, tí vit virða tann mentanarliga týdning, sum stovnurin hevur. Tí eiga vit at finna eina loysn. Ein beinleiðis kringvarpsskattur kann vera rætta loysnin til eitt kringvarp í fólksins tænastu, sum ikki skal grunda sítt tilverugrundarlag á fjant og fjas og spæl og lýsingar.
Nú er gylt høvi at rudda upp í Kringvarpinum – frá stýrinum og allan vegin niður gjøgnum stovnin.
