Starvsfólkið á tíðindadeildini í sjónvarpinum hjá Kringvarpinum krevja nú, at miðlaleiðarin í Kringvarpinum fer úr nevndini í privatari fyritøku í stundini og tey góðtaka ikki, at trúvirðið hjá stovninum verður skatt - enntá við góðkenning og almennum vælsignilsi frá sjálvum stjóranum. Starvsfólkið í tíðindaredaktiónini í Sjónvarpinum, krevja nú, at Allan Dalsgarð, sum er miðlaleiðari í Kringvarpinum, leggur frá sær sum nevndarlimur í lýsingavirkinum, Sendistovuni, í stundini, tí tey halda,
- Vit góðtaka ikki, at stovnsins og harvið okkara trúvirði verður skatt við góðkenning og almennum vælsignilsi frá sjálvum stjóranum, sigur starvsfólkið í opnum almennum mótmæli.
Tað, tey sipa til, er, at sjórin í Kringvarpinum hevur góðkent at Allan Dalsgarð, miðlaleiðari, hevur tikið sæti í nevndini í privata felagnum Sendistovuni.
-Starvsfólk í Kringvarpinum eiga sum meginreglu ikki at hava sæti í nøkrum nevndum uttan í nevndum, ið hava beinleiðis við fakið at gera, sum til dømis í fakfeløgum, har viðkomandi starvsfólk sjálv eru limir.
- At Kringvarpið er kundi hjá Sendistovuni, og at Allan Dalsgarð enntá er leiðari á deildini, sum varðar av hesum kundaviðurskiftum, ger bara støðuna enn meira høpisleysa.
Tey sipa eisini til, at sambært Dimmalætting fyrr í vikuni, hevur stjórin í Kringvarpinum sagt, at hon onki skeivt heldur vera í, at Allan Dalsgarð er vorðin nevndarlimur í Sendistovuni.
- Hinvegin heldur hon, at tað er fínt, at hann á henda hátt kann fáa íblástur aðrastaðir frá. At enda argumenterar hon við, at hon hevur so mikið álit á starvsfólkunum, at talan ikki verður um nakra favorisering.
- Við hesum má staðfestast, at øll óskrivað mørk fyri, hvat kringvarpsfólk kunnu loyva sær, nú eru burtur.
Starvsfólkið á tíðindaredaktiónini sigur, at trupulleikin er, at sjálvt um leiðslan ikki virðir hugtøkini trúvirði og fakligan integritet, so eru programmfólkini bundin av fjølmiðlaábyrgdarlógini og tilhoyrandi leiðreglum fyri góðum fjølmiðlasiði.
Tey leggja afturat, at eftir hesum leiðreglum kunnu tey ikki tilvitað seta trúvirði og integritet til síðis. Og tey kunnu heldur ikki góðtaka, at onnur á stovninum gera tað.
- Tí, góðtaka vit tað, verða vit samsek. Vit hava hinvegin skyldu til av øllum alvi at royna at verja okkara trúvirði og integritet ? og tískil okkara arbeiðspláss, siga starvsfólkini.
- Við hesum heita vit á kringvarpsstjóran um í stundini at áleggja miðlaleiðaranum at fara úr nevndini á Sendistovuni.
Samstundis eigur leiðslan at seta í gongd arbeiði við at orða ein politikk á hesum økinum, so vit í framtíðini sleppa undan at koma í slíkar støður aftur, siga starvsfólini á tíðindadeildini í Sjónvarpinum.
