Russland ávarar nú lond, sum loyva ukrainskum hernaðarflogførum at brúka flogvallir í landinum.
- Vit vita við vissu, at ukrainsk stríðsflogfør hava flogið til Rumenia og onnur grannalond, sigur ein talsmaður fyri russiska verjumálaráðið.
Tað er AFP, sum endurgevur tíðindini.
Stjórnin í Kreml sigur, at lond, sum lata ukrainar brúka sínar flogvallir, kunnu gerast partur av vápnaðum stríði.
Rumenia er limur í verjusamgonguni, Nato.
Sambært talsmanninum fyri russiska verjumálaráðið eru flestu ukrainsk stríðsflogfør oyðiløgd.
Forsetin í Ukraina, Volodymyr Zelenskyj, hevur fleiri ferðir heitt á vestanlond um at seta í verk flogbann yvir Ukraina, men hesum ynski hava londini ikki gingið á møti.
Vladimir Putin hevur eisini ávarað um, at eitt flogbann yvir Ukraina verður roknað sum krígsluttøka hjá teimum londum, sum seta eitt møguligt flogbann í verk.
