Krøvini veksa og Danmark dregur

Hetta er høvuðsmynstrið, nú ein nýggur árgangur av føroyskum miðnáms­skúlanæmingum eru um at gera seg lidnar, og fleiri velja at fara undir hægri útbúgving. Umleið 590 fólk fara í hesum døg­­um til endaliga próv­tøku á gymnasialu mið­náms­skúl­unum í Føroyum, upplýsir Mentamálaráðið.
Sambært tølum, sum stuðulsstovnurin Studni kunn­gjørdi fyrr í ár hev­ur talið á føroyingum á hægri lærustovnum verið støð­ugt vaksandi tey sein­astu árini.

Byrja fyrr
­– Rákið tykist at vera, at eitt sindur fleiri enn fyrr fara undir hægri lesn­að beint eftir miðnáms­skúlan, eg giti at talið man liggja um 10-20%. Tað kann hava samband við, at tað hevur verið eitt politisk ynski, at tey ungu byrja fyrr, og tað tykist sum at fleiri fara undir framhalds­lest­­ur í Dan­mark, har tey fáa bonusstig, um tey byrja innan tvey ár eftir mið­námsskúlan. Eis­ini kann arbeisloysið hava ein týdn­ing, sigur Holg­er Arn­bjerg á Altjóða Skriv­stov­uni, sum upplýsir, at meðal­aldurin á teimum les­andi sum heild er lækk­aður.
Samstundis vísa tøl­ini, at kappingin um tey væl­umtóktu lestrar­plássini harðnar. Skalt tú t.d. lesa medisin, altjóða politikk, retorikk, sálarfrøði á Uni­versi­tet­inum í Keyp­manna­havn, skal tú hava mint 10 í meðal.

Hástatus-fakini draga og tey flestu vilja til Keyp­­manna­havn­ar. Og í so máta tykj­ast før­oy­ing­ar­nir ikki at vera stórt øðr­vísi enn onnur, sigur Holg­er Arn­bjerg.

Hægri krøv
– Karakterkrøvini til tær vælumtóktu út­búgv­ing­ar­nar uttanlands eru í høv­uðs­heitum hækk­aði nakað tey seinastu árini. Fleiri lest­rarstøð í Danmark hava fingið karakterkrøv væl omanfyri 9 í meðal og hetta er eisini alment gald­andi fyri lærustovnar í Ong­landi, sigur Holger Arn­bjerg.
Tað, sum nógv hin­veg­in ikki gáa um er, at bróð­urparturin út­búgv­ing­un­um, sum verða ­bodnar út í Dan­mark hava eingi karak­ter­krøv. Velur tú t.d. at lesa mál í Sønderborg, sosiologi í Esberg ella sam­skiftisvísund í Kold­ing, er tað nóg mikið, at tú hevur eitt miðnámsprógv. Og soleiðis er tað so nógva aðrastaðni eisini.
– Sum dømi kann eg nevna at av teim­um til­samans 89 útbúgv­ing­un­um, sum Aalborg Uni­versi­tet bjóðaði út í fjør, vóru bert fýra út­búgv­ingar við karak­ter­­av­mark­ingum. Til allar hinar 85 útbúgvingarnar var tað nóg mikið, at tú hevði eitt miðnámsskúlaprógv. So tað er vert at leggja sær í geyma, at summastaðni er lættari at koma inn ella aðrastaðni. Hettar er gald­andi bæði fyri Danmark og onnur lond, sigur Holg­er Arnbjerg.