Um seks ella sjey ár skal tað verða koyrandi ígjøgnum Eysturoyartunnilin og ígjøgnum Sandoyartunnilin.
Tað liggur í semjuni, sum politisku flokkarnir eru í ferð við at gera um teir báðar undirsjóvartunlarnar.
Politiski tunnilsbólkurin hevur havt fund í dag og frammanundan vóru vónurnar tær, at tað skuldi eydnast at finna eina semju í dag.
Men tað gekk ikki heilt.
Páll á Reynatúgvu, sum umboðar Tjóðveldi í tunnilsbólkinum, sigur, at flokkarnir eru at kalla samdir.
Nú skulu tingmanningarnar hjá flokkunum umrøða málið og so er ætlanin at fáa tíð til at hava ein fund í morgin, har semjan verður endaliga samtykt.
Tað hevur ikki eydnast at fáa orðið á landsstýrismannin á økinum, Jørgen Niclasen, men tingmaðurin fyri Tjóðveldi væntar, at semjan verður formlig á næsta fundi.
Av tí sama, at semjan ikki er endalig, vil hann ikki siga nakað um smálutir í semjuni.
Men eftir tí, sum liggur í kortunum, skal verða koyrandi ígjøgnum báðar undirsjóvartunlarnar í 2020, ella í 2021.
Yvirskipað er ætlanin at stovna eitt alment partafelag, har privat eisini skulu fáa høvi at seta ábyrgdarpening í, afturímóti at tey fáa tryggjað eitt ávíst avkast.
|
