Sambært forkvinnuni í ES-nevndini, Ursulu von der Leyen, hevur bundinskapurin hjá Evropa av innflutningi av fossilum brennievni kostað Evropa fleiri milliardir evrur undir krígnum í Miðeystri.
Tað segði hon í røðu í Evropatinginum í Strasbourg í Fraklandi, skrivar dpa-tíðindastovan.
– Síðani stríðið byrjaði, eru gassprísirnir hækkaðir 50 prosent og oljuprísurin 27 prosent, sigur hon.
– Umroknar tú hetta til evrur, so hava tíggju dagar av kríggi longu kostað evropeisku skattgjaldarunum tríggjar milliardir evrur afturat í innflutningi av fossilum brennievni.
Tað svarar til stívliga 26 milliardir danskar krónur.
Fráboðanin frá von der Leyen kemur dagin eftir, at hon legði fram eina ætlan um kjarnorku í ES.
Her segði nevndarformaðurin, at stríðið í Miðeystri hevur varpað ljós á viðbrekna orkumarknaðin í Evropa og avhengi av fossilum brennievnum.
Nýggja evropeiska strategiin snýr seg um smáar modulreaktorar (SMR).
Sambært Danmarks Tekniske Universitet eru SMR smærri, verksmiðjubygdir kjarnorkureaktorar, sum sambært byggiharrunum verða meira búskaparligir og hava betri trygd enn siðbundnir reaktorar.
Sambært nevndini skulu smáu modulreaktorarnir vera í rakstri í Evropa í seinasta lagi í 2030-árunum.
Sambært von der Leyen skulu SMR-ini saman við siðbundnum kjarnorkureaktorum hava ein lyklaleiklut í eini "fleksiblari, tryggari og effektivari" evropeiskari orkuskipan.
Nevndin leggur upp til ymisk tiltøk fyri at tryggja útseting av SMR, eitt nú at gera reglurnar á hesum øki einfaldar og einsháttaðar tvørtur um landamørk.
Harumframt fer ES at áseta eina trygd uppá 200 milliónir evrur til at stuðla íløgum í nýskapandi kjarnorkutøkni.
/Ritzau/
