Lægemiddelstyrelsen staðfestir, eftir gjøgnumgongd av donskum og útlendskum frágreiðingum um hjáárin, at einki samband er millum eksem og koppseting móti lívmóðurhálskrabba Tað eru einki tekin um samband millum barnaeksem og koppsetingina móti lívmóðurhálskrabba, Gardasil. Tað slær Lægemiddelstyrelsen nú fast, eftir at hava gjøgnumgingið allar danskar og útlendskar frágreiðingar um hjáárin hjá evninum Gardasil.
Henda útmeldingin kemur í kjalarvatninum á, at danskir læknar, eftir øllum at døma í fleiri førum hava lagt merki til, at barnaeksem vendur aftur hjá gentum, ið eru koppsettar við Gardasil.
Eftir hetta varð ivi sáddur um, hvørt barnaeksem varð eitt higartil ókent hjáárin hjá nýggju koppsetingini. Men soleiðs er ikki, staðfestir Lægemiddelstyrelsen.
Nýggja koppsetingin verjir móti virusinum HPV (humane papilloma virus), sum er høvuðsorsøkin til lívmóðurhálskrabba.
Koppsetingin hevur verið á danska marknaðinum síðan 2006, og frá 1. januar 2009 hevur koppsetingin verið partur av barnakoppsetingarskipanini sum eitt tilboð til allar 12 ára gamlar gentur.
Í Føroyum er tilboðið nú komið til allar 14 ára gamlar gentur.
Samstundis liggur uppskot til eykajáttan til at koppseta allar gentur í árgangunum 1994, 1995 og 1996 á tingborði, og fyrsta viðgerð var í gjár.
