KONA
Tá ið alt er sagt
tá ið heimsspurningarnir eru
umrøddir út í æsir
tá ið eygu hava møtst
og hendur eru trýstar
í álvarsmiklum løtum
- kemur altíð onkur kona
at taka av borðinum
sópa gólvið og lata vindeyguni upp
fyri at sleppa sigarroykinum út.
Tað grettir ikki.
Ingibjørg Haraldsdóttir, Turið Sigurðadóttir týddi.
Ingibjørg Haraldsdóttir er fødd í Reykjavík. Hon tók magistaraprógv í filmsstjórnan í Moskva og var síðan í Kuba í 6 ár, har hon arbeiddi í leikhúsi. Hon fór aftur til Íslands í 1975. Hevur givið út fleiri
yrkingasøvn og týtt Dostojevski til íslendskt. "Kona" er úr savninum
"Orðspor daganna", 1983.
