Løgreglan hevur onga fráboðan fingið um skaðar av fýrverki og sum heild skikkaðu fólk sær væl, tá farið var inn í nýggja árið.
Av løgreglustøðini verður upplýst, at samanborið við onnur ár, so var nýggjárið rættiliga friðarligt í ár.
- Vit hava ongar fráboðanir fingið um skaðar í samband við fýrverk í ár og einki harðskapsmál er skrásett í ár. Í so máta hevur talan verið um eina friðarliga nátt, hóast nógv fólk hava verið úti, upplýsir vakthavandi á løgreglustøðini.
Í heimum kring landið verður nógv gjørt burturúr nýggjárinum og í trimum førum hava boð eisini verið eftir løgregluni at koma til hjálpar at loysa ósemjur millum fólk. Tey málini blivu loyst á staðnum.
Løgreglan hevur eisini fingið eina fráboðan um ein stolnan bil í Suðuroynni. Viðkomandi sum meldaði málið hevði illgruna um hvør tjóvurin var, og verður málið nú kannað.
