Rasmus Nolsøe, sum í ár hevur lagt upp til nógv mál hjá HB í góðum deyðbóltsstøðum, hevði ikki verið við teir síðstu dystirnar, men var við aftur í gjár, tá hann kom beint inn á liðið og spældi allar 90 minuttirnar í miðverjuni.
– Hetta er heilt fantastiskt. Eg kom heim, fyri at vit skuldu fáa tað avgjørt, og tað gjørdu vit. Spælið hevur kanska ikki altíð verið so flott og vit hava onkuntíð verið hepnir, men tann, sum liggur ovast, hevur altíð uppiborið tað, segði Rasmus.
– Hetta við gummibeinunum er kanska nakað sálarligt, ið ávirkar, men tað var deiligt at koma heim at hjálpa liðnum. Vit merktu kanska ikki, at vit vóru á odda, og tí slappaðu vit eitt sindur ov nógv av.
