Kókibókin um matstovuna KOKS, sum kom út í desember í fjør, er kosin at vera Ársins Besta Bókaverk 2012 í Danmark.
Tað er danski matjournalisturin Bent Christensen frá Den Danska Spiseguide, sum hevur skrivað bókina um kokkin á Koks, Leif Sørensen, og hansara føroysku matlist.
Síðani juni mánað hevur bókin verið at sæð á Kongaliga Bókasavninum, har framsýningin Årets Bedste Bogværk hevur verið.
Í donsku sjónvarpssendingini Aftenshowet á DR1 í gjárkvøldið tosaði stjórin á Kongaliga Bókasavninum millum annað um bókina um KOKS.
- Umframt at vera ein kókibók er hetta eisini ein listabók við teimum mongu vøkru myndunum, segði Erland Kolding Nielsen, stjóri á Kongaliga Bókasavninum.
Eisini rósti hann permuni á bókini.
- Innbindingin er so mikið vøkur, at hetta eisini er ein coffee-table-book; ein bók sum tú kant hava liggjandi á borðinum sum prýði, segði Erland Kolding Nielsen.
Til ber at síggja innslagið, har KOKS-bókin verður umrødd, her. Innslagið byrjar hálvan tíma inni í sendingini.
