Sjóverjuskip
Vestmenningar hava fingið við upp í bátastevnuskránna, at nýggja danska sjóverjuskipið Knud Rasmussen (mynd) fer at liggja við bryggju í Vestmanna leygardagin millum klokkan 12 og 14. Tá verður høvi hjá fólki at vitja umborð og síggja skipið. Sjóverjuskipið var fyrr í vikuni á Miðvági, men legði ikki til bryggju. Seinni sama kvøld var skipið at síggja í Vestmanna, og týsdagin kom ein lastbilur hjá donsku verjuni til Miðvágs við eini minu, sum skal setast upp á Krígssavninum í Vágum. Minan var tó óskaðilig. Myndin av Knud Rasmussen, sum vit prenta saman við hesum stubba, er tikin á Skálafjørðinum týsdagin, tá skipið sigldi aftur og fram har.
