Annað umfar í liðkappingini í talvi hevur verið í dag. Bæði liðini hjá klaksvíkingum vóru á heimavølli, og í Vestmanna vitjaði Tofta Talvfelag.
Eftir at toftamenn í fyrsta umfari vunnu tepurt á Havnar Telvingarfelag royndist tað ikki so væl í Vestmanna. Vestmenningar vunnu 3-1. Hetta var fyrsti sigurin hjá Vestmanna Talvfelag, sum í fyrsta umfarinum síðsta sunnudag tapti 4-0 í Sandavági.
Fyri viku síðani vóru Torbjørn Thomsen og Martin Brekká ikki við vestmenningum. Tað vóru teir í dag. Jens Christian Hansen, sum fyri viku síðani vardi fyrsta borðið hjá toftamonnum, var ikki við ídag.
Sandavágur og Havnin vitjaðu í Klaksvík. KTF 1 var vertur fyri sandavágsmonnum, sum tey seinnu árini hava staðið seg ógvuliga væl ímóti klaksvíkingum. Soleiðis var tað ikki í dag. Rógvi E. Nielsen úr Sandavági vann á fyrsta borði við hvíta fólkinum á Ólavi Simonsen, meðan KTF vann hini trý talvini og harvið dystin 3-1. Tað hoyrir við til søguna, at í dag var Carl Eli Nolsøe Samuelsen ikki á liðnum hjá sandavágsmonnum.
Havnin vann 3-1 á KTF 2. Klaksvíkingar vóru væl nøgdir við, at tað eydnaðist at vinna eitt stig. Tummas Martin Sólsker vann á triðja borði við svarta fólkinum á Hans Kristiani Simonsen.
Hesa ferð var FM vinnarin Olaf Berg á fyrsta borði hjá havnarmonnum. Hann var ikki við á Toftum fyri viku síðani.
2. umfar
KTF2-HT 1-3
Rani Nolsøe-Olaf Berg 0-1
Rani Baldursson-Martin Poulsen 0-1
Tummas Martin Sólsker-Hans Kristian Simonsen 1-0
Esbern Christiansen-Herluf Hansen 0-1
Vestmanna-Toftir 3-1
Torbjørn Thomsen-Andrias Danielsen 1-0
Jákup á Rógvu Andreasen-Rógvi Olsen 1-0
Martin Brekká-Brandur Højgaard ½-½
John Jacobsen-Rúni Jacobsen ½-½
KTF1-ST 3-1
Ólavur Simonsen-Rógvi Egilstoft Nielsen 0-1
Steintór Rasmussen-Høgni Egilstoft Nielsen 1-0
Finnbjørn Vang-Torkil Nielsen 1-0
Terji Petersen-Silas Eyðsteinsson 1-0
Støðan eftir tvey umfør
KTF 1 6 ½ stig
ST 5,0 stig
HT 4 ½ stig
TT 3 ½ stig
VT 3,0 stig
KTF2 1 ½ stig
Triðja umfar verður leygardagin 16. November kl. 10.00:
ST-KTF 2
TT-KTF 1
HT-VT
Mynd (Hans Hjalti Skaale): Høgni Egilstoft Nielsen og Steintór Rasmussen stríddust á øðrum borði, tá ið KTF 1 og ST hittust í gamla Tekniska skúla í Klaksvík í dag. Hølini hýsa annars frítíðarskúlanum.
