Klaksvíkingur stýrdi alla tíðina

10-MANNAFØR: Úrslitið í Hósvík bar ikki boð um, at tað skal eydnast Vestmenningi at vinna FM fyri fyrstu ferð síðani í 2000

Hvussu fer tað at hilnast, tá ið róðrarteinurin hjá 10-mannaførunum verður 2000 metrar og harvið 500 metrar longri, enn hann var á Norðoyastevnu. Hetta var ein av spurningunum undan næstu FM kappingini millum flaggskipini í kappróðrinum.
Í Klaksvík vann Klaksvíkingur fyri fyrstu ferð í 41 ár í heimasjógvi, men sigurin var ógvuliga tepur. Ta ferðina var tað bara stavnurin á muni, eftir at Vestmenningur hevði verið frammanfyri allar 1500 metrarnar.
Í Hósvík var einki at rafla um. Klaksvíkingur fekk betri start enn Vestmenningur og Hoyvíkingur, sum beinanvegin datt afturav og ongantíð gjørdi seg galdandi í kappingini.
Vestmenningur royndi fleiri ferðir at bjóða av, men Klaksvíkingur hevði sinniliga yvirskotið og stýrdi kappingini. Aftur og aftur hevur tað verið staðfest, at í slíkum støðum er tað ógvuliga torført at taka tann, sum er omaná, og soleiðis var tað eisini hesa ferð.
Vestmenningur fór fyrri undan endaspurtin, og eina løtu tóktist tað sum um, munurin fór at styttast eitt sindur, men so svaraði Klaksvíkingur aftur, og í endaspurtinum var eingin ivi. Við sannførandi og trivaligum tøkum og als ongari ábending um, at vandi var á ferð, rann Klaksvíkingur frá Vestmenningi, og á málinum var munurin meiri enn ein bátslongd.
Hagtølini siga, at vestmenningar eiga nógv fleiri sigrar í kappingini millum 10-mannaførini, enn klaksvíkingar eiga. Vestmenningur hevur ikki vunnið FM síðani í 2000, og eftir tvær av sjey FM kappingum er tað lítið, sum bendir á, at tað fer at eydnast í 2011.
Hóast sera sannførandi avrik hesa ferð, so kanna klaksvíkingar sær sjálvandi ikki FM heitið. Tað resta framvegis fimm róðrar, og í fleiri av hinum kappingunum í Hósvík sást, at tað ber væl til, at úrslitini eina ferð eru heilt øðrvísi, enn tey vóru frammanundan.
Veruleiki er tað tó, at tað skal ganga so ógvuliga nógv øðrvísi næstu ferðirnar, enn tað higartil hevur gjørt, um Klaksvíkingur ikki skal stevna beint fram ímóti FM heitinum. Á Trongisvágsfirði fæst at síggja komandi leygardag, um troysku vestmenningarnir fara at svara aftur.

Klaksvíkingur 09:29.18
2 Vestmenningur 09:32.21
3 Hoyvíkingur 09:53.17

Støðan
1 Klaksvíkingur 14
2 Vestmenningur 12
3 Hoyvíkingur 10