Klaksvík:
? Fyri at kunna fíggja íløgur komandi trý árini, kann tað fara at verða neyðugt at hækka lánið hjá kommununi, sigur Steinbjørn Jacobsen, borgarstjóri.
Hann sigur, at íløgurnar, sum tosað verður um, umfata serliga miðbýarætlanina, liðugtgerð av ringvegnum og økið við bátahylin uppi í Borðoyavík. Aðrar íløgur umframt.
Viðvíkjandi fígging og lántøku í hesum sambandinum, sigur Steinbjørn, at tað veldst nógv um, nær tær ymsu upphæddirnar fella.
Tær fyrstu átta milliónirnar fella í ár, og borgarstjórin væntar ikki, at tað fer at verða neyðugt at taka lán til tær. Men komandi ár og í 2006 verða íløgur fyri ávíkavist 11 og 10 milliónir, og tað er til hesar íløgurnar, at lán kunnu fara at verða neyðug.
? Tørvurin á hesum íløgunum er avbera stórur, og tað er sjálvandi í eitt sindur av døpurhuga, at farið verður inn á tosið um at taka lán, men kortini haldi eg, at tað er ikki vandi á ferð, so longi sum skuldin er niðan fyri eina álíkning, sigur borgarstjórin.
Skuldin hjá Klaksvíkar kommunu í dag liggur um tær 80 milliónirnar, men við árslok verður hon komin niður á 65.
? Vit hava tvinnar møguleikar í hesum sambandinum. Antin at hækka skattaprosentið ella taka lán, sigur Steinbjørn, sum hellir meira til at taka lán, sum hann ikki metir vera ábyrgdarleyst, tá skuldin er komin so langt niður.
? Kommunan hevur eina inntøku upp á 110 milliónir, og skuldin við árslok verður um 65, og hartil eru lánini munandi bíligari í dag enn í áttatiárunum við lága rentustøðinum, sum er í dag, sigur Steinbjørn Jacobsen.
