Seinnu árini hava línuskipini Kambur og Stapin verið bestu línubátar í Føroyum, og teimum í hølunum hevur Klakkur ligið.
Klakkur, sum soleiðis hevur andað hinar báðar í "nakkan" - um vit so kunnu siga - er í ár endaður á ovastu rók, har hann eisini hevur verið áður.
Í ár hevur Klakkur fiskað sløk 1500 tons, og veiðivirðið liggur oman fyri 16 miljónir krónur.
Næst størsta veiðivirðið í ár hevur línubáturin Kambur, sum hevur fiskað fyri stívliga 15 miljónir krónur.
Á triðja og fjórða plássi liggja línuskipini, Stapin og Havbúgvin, sum er fyrrverandi Núpur. Skipini liggja líka sum stavn um stavn, og trupult er at taka dagar ímillum skipini.
Stapin og Havbúgvin hava fiskað fyri stívliga 13 miljónir krónur hvør, men tá vit skiftu orð við reiðararnar mánadagin, var ikki greitt, hvør av teimum hevur størri veiðivirðið.
Góðir túrar
Tað eru brøðurnir, Líggjas og Bethuel Johannesen, sum skiftast um at føra Klakk, ið teir eiga saman við JFK-Troli.
Líggjas Johannesen letur rímiliga væl at fiskiskapinum í ár, men hann heldur, at fiskaprísirnir kundu havt verið betri.
– Vit hava ikki verið í Ný Foundlandi í ár, men vit hava gjørt tveir hampiliga góðar túrar í Eysturgrønlandi. Haraftrat hava vit eisini havt størri kvotu í íslendskum sjógvi í ár.
Líggjas Johannesen sigur, at Klakkur eisini hevur gjørt nakrar góðar túrar undir Føroyum.
– Fyrr í heyst høvdu vit tveir túrar á góð 200.000 pund undir Føroyum, og síðan høvdu vit ein túr á umleið 170.000 pund, sigur skiparin.
Brøðurnir, Líggjas og Bethuel Johannesen í Klaksvík, keyptu herfyri saman við JFK-Troli norska frystilínuskipið Urvaag. Skipið, sum væntandi verður klárt til fiskiskap umleið hálvan januar 2014, kemur í flotan fyri núverandi Klakk, sum annars er fiskikongur í ár.
