Klæmint A. Olsen spældi allan dystin, tá hann og liðfelagarnir í Breiðablik spældu javnleik 1-1 á heimavølli mót Stjörnuni í bestu íslendsku fótbóltsdeildini.
Stjarnan kom á odda 1-0 tá 62 minuttir vóru leiktir av dystinum. Tá 78 minuttir vóru leiktir javnaði Jason Daði Svanþórsson til 1-1.
Í tíðini dómarin hevði lagt aftrat hevði Klæmint ein risastóran málmøguleika at skora sigursmálið fyri Breiðablik, men Árni Snær Ólafsson í málinum hjá Stjörnuni bjargaði meistarliga.
Breiðablik er nummar trý í deildini við 34 stigum. Sjey stig eru upp til Víking Reykjavík, ið hevur spælt ein dyst færri enn Breiðablik.
Komandi mikukvøld klokkan 19 spælir Breiðablik í Parkini móti Keypmannahavn í seinna undankappingardystinum í øðrum umfarinum í Champions League. FCK er á odda 2-0 frá fyrra dystinum.
