Mánadagin fer Håkan Ericson, landsliðsvenjari hjá monnum, at seta navn á teir spælararnar, sum skulu við á venjingarleguna í Gibraltar og Spania. Klæmint A. Olsen er eitt mál frá at taka metið hjá Rógva Jacobsen, og hann verður væntandi við.
Liðskiparin hjá NSÍ var ikki við í fyrsta umfarinum, tá NSÍ vann 4-3 á EB/Streymi. Hann hevur ein fibur í tjúkkanum, men sigur í stuttari viðmerking til in.fo, at hann væntar at verða klárur til landsliðsdystirnar.
Ein maður, sum ikki verður við, er Brandur Hendriksson. Helsingborg IF hevur í dag boðað frá, at skálvíkingurin skal undir skurð fyri álvarsligan knæskaða, og væntast ikki at spæla aftur í 2022.
Leygardagin 26. mars klokkan 17:00 spæla Gibraltar og Føroyar á Victoria Stadion í Gibraltar, og týsdagin 29. mars klokkan 16:00 spæla Liktinstein og Føroyar á Pinatar Arena í Spania. FM1 er við á ferðini og sigur frá dystunum.
