Tað var bara eitt korter farið, tá ið Klæmint A. Olsen noyddist skaddur av vøllinum. Hetta var 6. mai, tá ið NSÍ hevði vitjan av B36, sum fór úr Runavík við 2-0 sigri.
Longu frammanundan, at B36 ferðalagið fór úr Runavík, var Klæmint fluttur á Landssjúkrahúsið. Har varð staðfest, at hann hevði brotið armin, og síðani hevur Klæmint ikki verið á vøllinum.
Hósdagin í síðstu viku var NSÍ liðformaðurin skurðviðgjørdur. Nú skal hann binda frið í nakrar vikur, og so fæst at síggja, hvussu leingi hann verður burtur frá fótbóltinum.
-Klæmint er í sínum borgarliga starvi handverkari, og vit vóna, at hann skjótt vinnur førleikan, so hann aftur verður førur fyri at røkja starvið, sigur NSÍ venjarin Sámal Erik Hentze.
-Tað ber ikki til at siga nú, hvussu leingi Klæmint verður burtur frá fótbóltinum. Tað fáa vit at síggja, tá ið hann hevur verið til kanningar, men tað verður neyvan fyrr enn um einar fimm ella seks vikur, at hann verður tøkur aftur, heldur NSÍ venjarin.
Klæmint A. Olsen hevur spælt 257 dystir í bestu landskappingini. Hann hevur skorað 153 mál, sum er sama talið, ið Jákup á Borg hevur skorað. Eingin hevur skorað so nógv mál í landskappingin, sum teir báðir hava skorað.
NSÍ skal undan summarsteðginum spæla fýra dystir í landskappingini: B36 (ú), AB (h), Víkingur (h) og Skála (ú).
