Greitt er til komandi kappingarár, at KÍ kvinnurnar skulu hava nýggjan málveja. Randi Wardum, ið hevur vart málið seinastu mongu árini, hevur boðað frá, at hon ikki stendur í KÍ málinum í 2015.
Harafturat hava KÍ kvinnurnar heldur ongan venjara í løtuni til komandi kappingarár.
Men sambært keldum hjá Miðlahúsinum, er okkurt ið bendir á, at ein serbiskur málverji bæði kann røkja málmansplássið og venjarasessin hjá KÍ í 2015.
Heri Ellingsgaard, ið rekur besta kvinnuliðið hjá KÍ, váttar fyri in.fo, at ein serbiskur málverji, ið kallast Ana Ivanov, í løtuni er til royndarvenjing hjá KÍ kvinnunum. Hon er komin til landið í dag, og hevur tí ikki vant við hinum kvinnunum enn.
Heri Ellingsgaard greiðir frá, at Ana Ivanov stóð í mál hjá Spartak Subotica í 2011, tá KÍ tapti 4-2 móti serbisku meistarunum.
26 ára gamla Ana Ivanov er skrásett fyri 1 landsdyst fyri serbiska a-landsliðið, sum hon spældi í 2012, tá Serbia tapti 4-0 móti Hollandi.
