Hóast tær hava vunnið gull oman á gull og aftur gull oman á gull, og hóast tær fyri stuttum hava tryggjað sær 16. FM heitið á rað, so er fagnaðurin ógvuliga stórur millum KÍ kvinnurnar, sum hava tryggjað sær 2-1 sigur í steypafinaluni ímóti EBS/Skála.
Superveteranurin Rannvá B. Andreasen skoraði sigursmálið stutt undan leikloki, tá ið hon umsetti brotsspark til mál:
-Hetta var fantastiskt. Talan var um sera tætta uppgerð, og í 1. hálvleiki vóru EBS/Skála betri enn vit, uttan at tær spældu seg til so stórar málmøguleikar. Í 2. hálvleiki kempaðu og stríddust vit, og tað er serliga hugaligt at vinna, tá ið tað var so tætt, sum tað var í dag, sigur Rannvá B. Andreasen í samrøðu við Hilmar Jan Hansen á Rás2.
Tað var tætt og spennandi alla tíðina. Hetta man vera ein tann mest spennandi kvinnufinalan nógvu tey seinastu árini.
Íðúnn Magnussen í EBS/Skála varð kosin at vera besti spælarin í finaluni.
KÍ kvinnurnar hava vunnið steypakappingina í 2000, 2002, 2003, 2004, 2006, 2007, 2008, 2010, 2011, 2012, 2013, 2014 og nú aftur í 2015.
KÍ-EBS/Skála 2-1 (0-0)
1-0: Malena Josephsen
1-1: Durita Hummeland
2-1: Rannvá B. Andreasen br
Dómari: Bent Tommy Linklett
KÍ: Ana Ivanov – Sigrid Jacobsen, Bára Skaale Klakstein, Ragna B. Patawary, Katrina Akursmørk - Eyðvør Klakstein, Olga Kristina Hansen – Rannvá B. Andreasen, Gudny Johannesen, Maria K. Thomsen– Malena Josephsen
EBS/Skála: Anna S. Hansen - Guðrið Poulsern, Rakul V. Magnussen, Durita Hummeland, Durita Mikkelsen – Fríðrún Danielsen, Sigrun K. Kristiansen – Ansy Sevdal, Birna T. Johannesen, Íðunn Magnussen – Margunn Lindholm
---
LIÐUGT
2-1!
Malena Josephsen hjá KÍ sær gult.
94) 2-1
Innskifta Hervør Olsen tiltuskar KÍ fríspark heilt frammi við hornaflaggið í høgru.
93) 2-1
KÍ gevur sær góðar stundir í sambandi við málspark.
92) 2-1
EBS/Skála leggur øgiliga nógv fyri. Málverjin, Anna S. Hansen, er í KÍ brotsteiginum í sambandi við horna, sum einki spyrst burturúr.
91) 2-1
Rannvá B. Andreasen er so mikið skaðadarvað, at hon ikki megnar at renna meir!
90) 2-1
4 minuttir lagdir aftrat!
89) 2-1
KÍ veteranarnir kennast vera ógvuliga troyttar, men tær stríðast og kempa saman við liðfeløgunum fyri at varðveita leiðsluna.
86) 2-1
2-1: Rannvá B. Andreasen br
Veteranurin er ósvikaliga trygg, tá ið hon setir bóltin til vinstru fyri seg sjálva, meðan málverjin tveitir seg í hitt borðið.
85) 1-1
Dómarin, Bent Tommy Linklett, bríkslar fyri brotssparki, tí ein av EBS/Skála verjuspælarunum fær bóltin í armin.
84) 1-1
Sigrid Jacobsen hjá KÍ sær gult fyri fríspark.
83) 1-1
Rannvá B. Andreasen hjá KÍ hevur ligið skadd í EBS/Skála brotsteiginum, men nú er hon á fótum aftur, og spælið verður bríkslað í gongd aftur.
81) 1-1
Tað eru nógvir áskoðarar kring Tórsvøll, og teir stimbra sínum liðum øgiligt.
78) 1-1
Gudny Johannesen fer av vøllinum og í hennara stað kemur Hervør Olsen inn á KÍ liðið. Tað var hon, sum skoraði einasta málið í finaluni í fjør. Hervør fer í álopið, og Malena Josephsen fer aftur á miðvøllin.
76) 1-1
1-1: Durita Hummeland
Bara eina lítla løtu var KÍ frammanfyri. Eftir horna úr vinstru var tað miðverjin Durita Hummeland, sum við høvdinum smekkaði bóltin í málið. Nú er púra opið aftur!
73) 1-0
Tvíburarnir Ragna og Rannvá hjá KÍ síggja báðar gult fyri at skifta um troyggju beinanvegin eftir 1-0 málið.
71) 1-0
1-0: Malena Josephsen
So hevur KÍ lagt seg framum. Maria K. Thomsen hevur verið vandamikil í vinstru í tveimum umførum, og nú endaði tað við, at bólturin varð spældur út frá til veteranin Malenu Josephsen, sum mitt fyri og úr 9 metrum setti bóltin í málið.
70) 0-0
KÍ er meiri framrættað nú, enn favorittarnir vóru í 1. hálvleiki.
69) 0-0
Tað kennist sum um, at finalan er í avgerandi fasu. Nú var KÍ tætt við eftir innlegg frá Katrina Akursmørk hjá KÍ - stórur spenningur!
67) 0-0
Spælarar hjá báðum liðum hita upp, men higartil er bara ein skifting gjørd - ein hjá EBS/Skála.
64) 0-0
Intensiteturin er ógvuliga høgur, og nú var um reppið, at Rannvá B. Andreasen úr høgru spældi Olgu Kristinu Hansen leysa, og nøkur sekund seinni varð Maigunn Lindholm bríklsað fyri rangstøðu í hinum endanum!
62) 0-0
KÍ málverjin Ana Ivanov hevur gott eyga við spælinum og er ofta eyka miðverji.
61) 0-0
Kára Durhuus er komin inn í EBS/Streyma álopið. Durita Mikelsen er farin av vøllinum, og Birna Johannesen er flutt aftur á vinstra vongverja.
60) 0-0
íðúnn Magnussen var um reppið at verða leys innanfyri KÍ verjuna, men málverjin ruddaði burtur.
58) 0-0
Bæði liðini hava havt góðar frísparksstøður, men í báðum førum vóru innleggini óneyv, og bólturin sigldi inn til málverjarnar.
55) 0-0
EBS/Skála trýst er um reppið at bera stóran málmøguleika við sær, men KÍ málverjin hevur ongar trupulleikar eftir innlegg úr høgru.
52) 0-0
Nú er KÍ ágangandi. Eftir diagonalsending úr høgru roynir Maria K. Thomsen seg við skoti úr vinstru, men bólturin fer omanfyri málið.
51) 0-0
Eftir KÍ horna er tað vandamikið undir EBS/Skála málinum, tá ið málverjin missir bóltin, men EBS/Skála megnar at rudda burtur.
49) 0-0
Spælbýtið minnir nógv um soleiðis, sum tað var undan steðginum.
47) 0-0
Lívlig byrjan - fyrst KÍ horna og so skjótt mótálop hjá EBS/Skála, sum KÍ málverjin steðgar við mitt á egnari hálvu at sparka burtur.
46) 0-0
Ongar skiftingar eru gjørdar.
0-0
Liðini eru komin á vøllin aftur, og hjálparvenjarin hjá EBS/Skála Sunnuvá Vesturdal er væl nøgd:
-Vit hava tosað um, at tað er týdningarmikið at halda fram við sama lag. Vit hava staðið okkum væl, og tað restar bara at fáa bóltin í málið.
0-0
KÍ venjarin Oddbjørn Joensen ásannar í samrøðu við Rás1, at spælið hjá hansara liði hevur ikki verið nóg gott í 1. hálvleiki:
-EBS/Skála hevur verið eina tonn omaná. Nú mugu vit í steðginum tosa um, hvussu vit fáa bóltin niður á vøllin og so samanspæla skilagott. Tað vóna vit fer at eydnast. Higartil hevur tað ikki eydnast, sigur KÍ venjarin.
45) 0-0
Eftir EBS/Skála horna úr høgru frá Margunn Lindholm og roynd úr átta metrum bjargaði Maria K. Thomsen á strikuni við handara stólpan.
42) 0-0
Rannvá B. Andreasen hevur roynt seg við langskoti, men bólturin sigldi omanfyri EBS/Skála málið. Hetta var fyrsta skotroyndin hjá KÍ.
38) 0-0
Ferðin er hampuliga høg, men tað er langt millum málmøguleikarnar. KÍ kvinnurnar gera nógv mistøk.
32) 0-0
EBS/Skála hevur greiða yvirvág á sentrala miðvøllinum, og síðstu løtuna hevur bólturin verið væl meiri á KÍ hálvuni.
30) 0-0
EBS/Skála aftur góða roynd. Eftir langa sending fram í høgru, so sendi Birna Johannesen úr høgru, men bólturin datt niður í nettakið.
27) 0-0
Tað knípir hjá báðum pørtum at spæla seg til møguleikar. EBS/Skála hevur bóltin meiri og betri tak á samanspælinum.
25) 0-0
Ansy Sevdal hjá EBS/Skála sær gult fyri at blokera, tá ið Olga Kristina Hansen hjá roynir at skunda sær við frísparki.
22) 0-0
KÍ roynir seg oftast við longum sendingum fram til Malenu Josephsen ella Mariu K. Thomsen.
20) 0-0
Tað er størri breiddi og tyngd í álopsspælinum hjá EBS/Skála, men burtursæð frá risa møguleikanum beinanvegin er ikki eydnast liðnum at spæla seg til upplagdan møguleika.
15) 0-0
Nú gongur tað mesta fyri seg millum brotsteigarnar báðar.
13) 0-0
Tað er meiri friður yvir KÍ spælinum, enn tað er hjá EBS/Skála, sum ofta skundar sær meiri, enn tað er neyðugt, og so verða avgerðirnar og sendingarnar skeivar.
10) 0-0
Hóast KÍ er favorittur, so hevur tað fyrstu løtuna einki verið, sum hevur bent á, at EBS/Skála ætlar sær at verja og bara verja.
8) 0-0
Tað er lívligt og tætt. KÍ hevur havt horna í vinstru, og nú hevur EBS/Skála tiltyuskað sær horna í vinstru, men bólturin verður stútaður skeivu megin stólpan.
5) 0-0
KÍ hevur tiltuskað sær horna í høgru, sum endaði við, at Eyðvør Klakstein við langskoti setti bóltin við síðuna av málinum.
3) 0-0
Eftir innlegg frá Ansy Sevdal var tað um reppið, at Margunn Lindholm rakk at seta bóltin í KÍ málið - risa møguleiki fyri opnum máli!
1) 0-0
KÍ gevur bóltin upp
0)
KÍ og EBS/Skála eru tvey tey bestu liðini í kvinnukappingini. EBS/Skála er næstfremst, og KÍ er topplið. Hóast tað framvegis resta nøkur umfør, so hevur KÍ longu tryggjað sær FM heitið. Hetta er tað 16. FM heitið á rað, sum KÍ hevur vunnið, og tað er nýtt heimsmet.
0)
KÍ hevur verið í øllum finalunum síðani 1999, og KÍ hevur vunnið allar finalurnar síðani 2010.
Einaferð áður hava EB/Streymur, sum nú er samanlagt lið við Skála, verið í finaluni. Tað var ímóti KÍ, sum vann 15-0!
Tað er av fagrastu líkindum í Gundadali, har KÍ og EBS/Skála klokkan 16.16 bresta saman í finaluni í kvinnukappingini.
Fleiri finalur í yngru deildunum hava verið longu í dag. Longu á middegi vóru fyrstu áskoðararnir á Tórsvølli, og nú eru tað rættiliga fitt av fólki kring vøllin.
Áskoðararnir hjá feløgunum báðum hava rættiliga riggað seg til við at seta lit á.
Kvinnufinala í steypakappingini
KÍ-EBS/Skála kl. 16.15
Dómari: Bent Tommy Linklett
KÍ: Ana Ivanov – Sigrid Jacobsen, Bára Skaale Klakstein, Ragna B. Patawary, Katrina Akursmørk - Eyðvør Klakstein, Olga Kristina Hansen – Rannvá B. Andreasen, Gudny Johannesen, Maria K. Thomsen– Malena Josephsen
EBS/Skála: Anna S. Hansen - Guðrið Poulsern, Rakul V. Magnussen, Durita Hummeland, Durita Mikkelsen – Fríðrún Danielsen, Sigrun K. Kristiansen – Ansy Sevdal, Birna T. Johannesen, Íðunn Magnussen – Margunn Lindholm
