Fyri fyrstu ferð í 32 ár er í dag aftur loyvt at drekka sterkt øl Føroyum so sum góða gamla Elephantin frá Carlsberg. Tað skal hátíðarhaldast, heldur løgmaður.
Hóast Rúsan ikki hevur opið sunnudag, so hevur Kaj Leo Holm Johannesen, løgmaður, givið Rúsini undantaksloyvi at hava opið í dag, sunnudagin 1. apríl, tá Rúsan í Havn hevur opið sum leygardagin, frá klokkan 10 - 14.
Hetta er ein so stórur dagur fyri so nógvar føroyingar, sum hava bíðað í 32 ár fyri at sleppa aftur at drekka góða gamla Elephantin. Vit kunnu ikki bara tí at 1. apríl er ein sunnudagur vera bekent at lata Føroya fólk bíða líka til í morgin, sigur Kaj Leo Holm Johannesen, løgmaður, sum tí hevur givið Rúsuni í Havn undantaksloyvi til at hava opið í dag. Hann vísir á, at tá løgtingið fríggjadagin setti allar tíðarfreistir til viks fyri at fáa ølsøluna upp á pláss, so er tað so nátúrligt, at løgmaður eisini gevur Rúsini hetta undantaksloyvi.
Løgmaður sigur, at orsøkin til, at tað bara er Rúsan í Havn, sum hevur fingið undantaksloyvi er, at slík mál hava størstan týdning fyri havnarfólk.
Á bygd hugsa fólk øðrvísi. Tey fara í kirkju og á møti, og teimum kemur als ikki til hugs at drekka øl sunnudag, sigur Kaj Leo Holm Johannesen.
Og so avmarka vit útreiðslurnar við ikki at lata allar Rúsurnar hava opið í dag. Eg havi eisini sagt við Allan Skaalum, at landsstýrið bara vil gjalda fyri 100 tey fyrstu, sum fáa ein ókeypis »six-pack« av Elephanti, sigur hann.
Allan Skaalum, stjóri í Rúsini er sera fegin um hetta tilboðið frá løgmanni.
Hetta er ordiliga gott. Vit høvdu als ikki hugsað um hendan møguleikan, og tí hava vit ikki biðið um undantaksloyvi at hava opið í dag. Men tá løgmaður ringdi til mín í vikuni og spurdi, um tað ikki var eitt gott hugskot at bjóða ókeypis Elephant-øl í dag sum Føroya Landsstýri rindar fyri kundi eg ikki annað enn taka av, sigur Allan Skaalum, sum er sera fegin um, at vit hava ein so umhugsnan løgmann.
