- Eg gjørdi tað!
Soleiðis ljóðaði støðudagføringin á facebook hjá russiska skemtaranum, Vitaly Zdorovetskiy, stutt eftir at HM-finalan í fótbólti var av í gjárkvøldið. Tað var hann, sum rann á vøllin og skapti ein lítlan steðg í dystinum meðan hann varð fangaður og førdur av vøllinum.
Russiski Vitaly Zdorovetskiy er 22 ára gamal og er vorðin kendur á YouTube, har hann við skemtiligum sjónbondum hevur fingið fleiri enn seks milliónir skrásettar fylgisneytar. Best umtókta sjónbandið hevur verið víst næstan 40 milliónir ferðir.
Vitaly hevði dagarnar áðrenn HM-finaluna róð fram undir, at hann fór at gera eitthvørt. Dagin fyri skrivaði hann á Twitter: “Vit síggjast á sjónvarpsskíggjanum í morgin”, og stutt áðrenn finaluna skrivaði hann: “Í dag er ein stórur dagur fyri meg.”
Við áskriftini “Natural Born Prankster” rann hann so á vøllin seint í seinna hálvleiki, og lítla løtu eftir dystin var hann so aftur at síggja á facebook, har hann skrivaði “Eg gjørdi tað!” og viðhefti eina mynd, har hann royndi at kyssa týska vinstra bakkin, Benedikt Höwedes.
Hann hevur síðani lagt mynd út á facebook, har hann situr í brasilskum fongsli. Tað hugsar hann helst minni um, nú hann er vorðin enn meiri kendur enn frammanundan. Heili 30.000 fólk skrivaðu støðudagføring um hendingina á Twitter, har hann eisini ger um seg.
