Myndugleikarnir í Venesuela hava tikið Maximiliano Bonilla Orozco, sum hevur verið lýstur sum ein tann ringasti rúsevnabarónurin í Suðuramerika og øllum heiminum. Hann er millum annað undir illgruna fyri at hava sent fleiri tons av kokaini til USA, og amerikonsku myndugleikarnir høvdu lovað fimm milliónir dollarar í finningarløn, bleiv hann avdúkaður og tikin.
Tann 39 ára gamli Orozco, sum er føddur í Kolombia, hevur fjalt seg í Venesuela tey seinastu árini, men samstarv millum myndugleikarnar har og myndugleikarnar í øðrum londum endaði við, at hann nú er tikin.
Vælvitandi keldur siga, at Maximiliano Bonilla Orozco hevur verið fullkomiliga eirindaleysur sum rúsevnabrotsmaður. Fyri fleiri árum síðani fór hann at arbeiða saman við meksikanska rúsevnakervinum Los Zetas, og saman hava tey sent fleiri tons av kokaini út á amerikanska marknaðin. Teir amerikonsku myndugleikarnir siga, at rúsevnið bleiv smuglað ígjøgnum fyritøkur, sum tóktust vera lóglýdnar í allar mátar, men sum kortini ikki høvdu reint mjøl í posanum.
