Einki er so gott, at tað ikki er ringt fyri okkurt.
Tann leingi liggjandi kavin, sum hevur verið seinasta hálva mánaðin, ger nevniliga at SEV má seta meira á dieselmotorarnar fyri at framleiða nokk av el-orku til føroyingar.
Á yvirlitinum á heimasíðuni hjá SEV sæst, at í løtuni verða 78 prosent av el-orkuni framleidd av olju, meðan bert 12 prosent verða framleidd av vatni og 10 prosent av vindi.
Henda gongdin hevur víst seg at vera alla tíðina, síðan kavin hevur ligið, og er tað alt annað enn gott fyri hagtølini, tá veturin vanliga er tann tíðin, ið minst olja verður nýtt til orkuframleiðslu.
Ein avleiðing av hesum er, at hitapumpurnar, ið koyra upp á el, nú eru minni umhvørvisvinarligar enn vanligt, tá el orkan alíkavæl verður framleidd av dálkandi oljuni.
Og sum veðurvánirnar eru í løtuni, er ikki líkt til at kavin fer vekk aftur í bræði.
