Kavaódnin, sum herjaði stóran part av Íslandi í gjár, fór illa við elveitingini á Norðurlandinum og eystari. Orkufelagið RARIK sigur, at skaðin á elveitingina hjá teimum er tann størsti síðani 1995.
Tað var serliga tann nógvi klakin, sum legðist á træðrirnar, sum gjørdi skaða. At enda stóð so nógv á, at nógvir steyrar brotnaðu, og tí hava nógv fólk har eysturi á Norðurlandinum ikki fingið streymin aftur enn.
Bóndurnir stúra fyri, at teir hava mist nógvan seyð í kavaódnini. Ein bóndi sigur við Morgunblaðið, at hann hevur hjálpt livandi seyðí, sum lá millum tveir og tríggjar metrar undir kava.
Tað var ikki bara nógvur kavi, men eisini stormur, og bjargingarfeløgini hava havt úr at gera.
