Landsstýrismaðurin í innlendismálum tvíheldur um, at alt arbeiðið í sambandi privata Eysturoyartunnilin er farið rætt fram.
Kári P. Højgaard, landsstýrismaður í innlendismálum, hevur verið fyri hørðum ákoyringum í sambandi við ætlanina at lata privat felag gera og reka Eysturoyartunnilin. Í gjár kom eitt løgfrøðiligt skjal undan kavi, har løgfrøðingar í Innlendismálaráðnum hava nógvar atfinningar og spurningar til lógaruppskotið um Eysturoyartunnilin. Hesar viðmerkingar hava verið goymdar í Innlendismálaráðnum, tí sagt hevur verið, at viðmerkingarnar hava verið partur av innanhýsis arbeiðsgongd. Ikki fyrr enn í gjár fingu fjølmiðlar og løgtingsfólk skjalið.
Kári P. Højgaard, landsstýrismaður, heldur fast um, at hann hevur einki skeivt gjørt – hvørki í sambandi við løgfrøðiligu viðmerkingarnar ella í sambandi við samráðingarnar um Eysturoyartunnilin.
- Tað er ikki vanligt, at landsstýrismaðurin blandar seg upp í løgfrøðisligu viðgerðina av einum lógaruppskoti. Tað havi eg ongantíð gjørt, og tað havi eg heldur ikki gjørt í sambandi við uppskotið um Eystoyartunnilin, sigur Kári P. Højgaard við Kringvarpið.
Hann sigur, at tað er ikki vanligt, at viðmerkingar av hesum slagi verða sendar saman við málunum í løgtingið. Hann vísur eisini á, at fleiri av ivamálunum, sum verða reist í viðmerkingunum hjá løgfrøðingunum, eru greidd í loyniliga sáttmálanum við privata felagið.
- Eg hevði eina heimild frá løgtinginum til at fara í samráðingar. Felagið, sum vit samráddust við, ynskti at hava sáttmálan í trúnaði, og tað máttu vit virða, tí annars høvdu vit ongan samráðingarpartnara. Tað, sum skal tryggja at alt er gingið rætt fyri seg, er, at vit hava havt bestu ráðgevingina, og løgfrøðingar í innlendismálaráðnum hava eisini verið við alla tíðina. Uppgávan er loyst til fulnar, og eg haldi, at hetta er ein góður sáttmáli, sigur Kári P Højgaard við Kringvarpið.
- Higartil havi eg fylgt bókini hundrað prosent, hundrað og tíggju prosent. Handfaringina av málinum kann mann diskutera, men alt er gjørt eftir bókini, sigur hann við KvF.
