Í dag verður fyrsti FM kappróðurin í ár. Sum altíð so verður lagt fyri á norðoyastevnu í Klaksvík.
Tað eru 50 ár síðani, at fyrstu føroyameistararnir í kappróðri vórðu funnir. Tað var í 1964, at skipað var fyri fyrstu kappingini um FM. Frá 1964 og fram til 1972 varð ein sunnudag eftir ólavsøku kappast um FM heitið. Síðani 1973 hevur FM kappingin verið skipað soleiðis, sum hon framvegis er kend.
Kappróðurin á norðoyastevnu hesa ferð er merkisverdur á tann hátt, at hetta er fyrsta ferðin, at tað bara verður kappast á 1000 metra teininum. Nógvu tey seinastu árini hevur tað í Klaksvík ikki verið møguleiki fyri at kappast á 2000 metrum.
Málið undir Kunoyarnesi og inn á vánna var ongantíð fullar tveir kilometrar. Tá ið aliringar vórðu lagdir undir Kunoyarnesi bar ikki til at rógva har, og síðani hevur bara verið kappast á 1000 og 1500 metrum.
Í fjør varð skipanin broytt soleiðis, at tað kring alt landið bara varð kappast á 1000 og 2000 metrum og ikki á 1500 metrum. Á norðoyastevnu varð tó kappast á 1000 og 1500 metrum. Men í ár verður altso bara kappast á stutta teininum á norðoyastevnu og í øllum hinum seks FM kappingunum.
Tað var á ársaðalfundinum hjá Róðrarsambandinum fyrr í ár, at tað varð samtykt, at tað nú bara skal kappast á stutta teininum. Høvuðsorsøkin er, at harvið slepst undan bíðitíðini, tá ið fasti starturin verður fluttur. Bíðitíðin hevur mangan verið í tímar, og tað hevur havt við sær, eru tað tey, ið halda, at áhugin fyri at rógva og fyri at fylgja kappróðrinum hevur verið minkandi.
Lagt verður fyri við barnaróðri klokkan 13, og klokkan 15 verða hinir róðrarnir.
Róðrarlíkindini eru góð í Klaksvík. Vágin liggur sum ein sveiti, lotið, sum er millum lítið og einki, er ímóti, og lágættin ber við sær, at tað er turt og milt.
