Tað tykist alsamt meiri sannlíkt, at José Mourinho skiftir til Real Madrid, men Inter Milan vil ikki sleppa framherjanum, Diego Milito, ið avgjørdi Champions League finaluna. Eftir Champions League sigurin á Bayern Munchen, segði José Mourinho, venjari hjá Inter Milan, við týkst sjónvarp, at hann skal venja Real Madrid komandi ár. Tað er ikki alment kunngjørt enn, men eigarin og forsetin í Inter Milan, Massimo Moratti avsannar ikki tíðindini.
- Eg havi bara eitt at siga; tað er munur á José Mourinho og Diego Milito. Mourinho hevur eina grein í sáttmálanum, ið ger at hann kann skifta felag, men tað hevur Diego Milito hinvegin ikki, sigur Moratti
30-ára gamli Diego Milito varð í summar keyptur frá Genoa og hevur havt eitt gott ár. Hann skoraði bæði málini, tá Inter Milan leygarkvøldið vann 2-0 í Champions League finaluni ímóti Bayern Munchen. Í italsku steypakappingini, Coppa Italia, skoraði hann einasta málið í finaluni ímóti AS Roma. Í landskappingini skoraði hann eisini avgerandi málið í seinasta dystinum, ið gjørdi Inter til italskar meistarar. Hann er eisini úttikin til hópin hjá Diego Maradona, sum skal til HM í Suður Afrika.
