Eitt lið við kanningarfólki frá ST kjarnorkustovninum, IAEA, er á veg til kjarnorkuverkið Zaporizjzja í eystarapari av Ukraina.
Tað upplýsir Rafael Grossi, sum er stjóri í IAEA, í morgun á boðum á Twitter.
– Dagurin er komin. Stuðuls- og hjálparferðin hjá IAEA til Zaporizjzja er nú á veg. Vit mugu verja trygdina í størsta kjarorkuverkinum í Ukraina og Evropa. Errin av at leiða hesa ferð, skrivar Grossi.
Hann leggur afturat, at kanningarfólkini koma til verkið í hesi vikuni.
Serfrøðingarnir frá IAEA skulu kanna skaðar og trygdarskipanirnar á verkinum, sum fleiri ferðir er álopið í krígnum millum Russland og Ukarina.
Russiskar deildir tóku verkið í mars.
Síðani hevur IAEA ávarað um eina møguliga kjarnorkuvanlukku við orkuverkið. Millum annað tí at bæði Ukraina og Russland av lagt hvønn annan undir at skjóta rakettir nærindis verkinum.
Embætismenn í Ukraina hava sagt, at Russland hevur tikið valdið á verkinum fyri at taka tað av netinum hjá Ukraina. Málið skal vera at lata streymin til Krim-hálvoynna, sum russar tóku í 2014.
Kjarnorkuverkið hevur seks reaktorar. Tað eru tó bara tveir av teimum, sum enn eru í nýtslu.
Teir báðir reaktorarnir vórðu fyri stuttum fyribils stongdir vegna eld, sum skaddi káplar frá verkinum. Raksturin varð tó tikin uppaftur í síðstu viku.
Sambært forsetanum í Ukraina, Volodymyr Zelenskyj, sluppu tey akkurát undan eini kjarnorkuvanlukku, tá streymurin til verkið varð avbrotin.
– Um starvsfólkini á verkinum ikki høvdu verið so skjót at sløkkja streymin, so vóru vit longu rakt av avleiðingunum av eini kjarnorkuvanlukku.
– Russland hevur sett Ukraina og Evropa í ein støðu, har tey bara eru eitt fet frá eini kjarnorkuvanlukku. Hvønn minutt, russarar eru á verkinum, er vandi fyri eini altjóða kjarorkuvanlukku, segði Zelenskyj fríggjadagin.
/ritzau/
