Hvussu nógv rinda allir almennir stovnar í bummgjaldi um árið fyri at koyra ígjøgnum undirsjóvartunlarnar?
Tað er ein spurningur, sum Jógvan Skorheim, tingmaður fyri Sjálvstýrisflokkin, nú vil hava svaraðan.
Seinastu tíðina hevur nógv verið frammi um, hvussu raksturin av undirsjóvartunlum skal skipast frameftir.
Tó hevur Landsverk nú almannakunngjørt ársfrágreiðing, har tað verður staðfest, at undirsjóvartunlar kosta 775 krónur meturin at halda.
Verður hetta roknað um til teinin í Vágatunlinum og Norðoyatunlinum, samsvarar hetta við, at tunlarnir kosta stívliga átta milliónir krónur um árið at halda, sigur tingmaðurin.
Jógvan Skorheim vísir á, at landið skal yvirtaka tunlarnar, tá ið teir eru útgoldnir og tá skal raksturin leggjast undir landið.
Tí heldur hann, at tað hevði verið áhugavert at vita, hvussu nógv allir teir almennu stovnarnir brúka í bummgjaldi til hesar tunlar.
Hann sigur, at so kann tað talið setast upp ímóti tí, sum tað kostar at reka tunlarnar.
- Við hesum tølum verður lættari at síggja, hvussu nógv ella lítið raksturin hækkar, tá tunlarnir verða lagdir undir landið, sigur Jógvan Skorheim.
