Um middagsleitið í gjár vórðu seks fólk funnin deyð í einum húsum í Ulstrup, sum liggur nakað sunnan fyri Randers í Danmark. Tey deyðu vóru eini hjún og teirra fýra børn, sum eru í aldrinum millum 3 og 16 ár.
Síðani hevur løgreglan kannað húsini og umstøðurnar, og kanningarnar halda fram í dag.
Løgreglan sigur í fráboðan, at hendingin verður kannað sum eitt drápsmál. Talan er um sera umfatandi kanningararbeiði, og tí ganga nakrir dagar, áðrenn løgreglan vil siga nakað um, hvat tey halda hendi í húsunum.
Ekstrablaðið skrivar í morgun, at grannar kendu gassroyk í grannalagnum, og at øll vindeygu í húsunum vóru latin upp, tá ið løgreglan kom á staðið. Hetta er tó ikki váttað av løgregluni.
