Nú skal ein umfatandi kanning avdúka, hvussu stendur til við happing í føroyskafólkaskúlandum.
Kanningin verður gjørd í næsta mánað og endamálið er at fáa tøl fyri, hvussu illa føroyskar fólkaskúlanæmingar happa hvønn annan. Tað skrivar Skúlablaðið í morgun.
Endamálið er eisini at vita um menningarætlanirnar í skúlunum skulu endurskoðast. Og samstundis er endamálið eisini at skipa fyri menningarátøkum fyri at minka um happing, og sostatt økja um trivnað og læring hjá fólkaskúlanæmingum.
Kanningin fevnir um allar næmingar í 5., 7. og 9. flokki í fólkaskúlanum, og kanningin verður gjørd í skúlunum í døgunum frá 10. - 21. nov. 2014.
Ein kanning um happing var gjørd í 2007 í øllum 5., 7. og 9. flokkunum, har umleið 2200 næmingar luttóku.
Við støði í kanningarúrslitinum vóru ymisk átøk sett í verk m.a., at allir skúlar gjørdu trivnaðarætlan, har happing var eitt øki, umframt at fokus var sett á trivnað og virði í skúlunum á ymsan hátt.
Ætlanin við kanningini er at fáa til vega dagførda vitan um happing í skúlunum og eisini eina ábending um, í hvønn mun átøkini, sum sett eru í verk, hava munað, sigur Skúlablaðið. |
