Tað er ikki greitt, um nakað DNA-spor er á gamla frakkanum hjá Olof Palme, men tað serliga løgregluliðið, sum framvegis kannar morðið, sigur, at allir møguleikar skulu kannast.
Eg havi verið í Linköping og tosað við umboð fyri ta kriminalteknisku rannsóknarstovuna, sum skal gera kanningarnar, sigur Stig Edqvist við Aftonbladet. Tað er hann, sum stendur fyri Palme-kanningunum. Sambært blaðnum er rannsóknarstovan í Linköping tann fremsta av sínum slagi í Svøríki, og fleiri av teimum fremstu svensku DNA-serfrøðingunum arbeiða har.
Svcenska løgreglan hevur harafturat gjørt av at leita sær hjálp frá nøkrum av teimum fremstu DNA-serfrøðingunum í heiminum. Tí hevur løgreglan samband við Forensic Science Services í Birmingham í Bretlandi og rannsóknarstovuna hjá týsku kriminalløgregluni í Wiesbaden, skrivar Aftonbladet.
