Tað gekk sum eftir ánni, tá ið triði FM kappróðurin leygardagin var á Eystanstevnu á Skálafjørðinum. Høgættarlotið var orsøk til, at tað ikki var púra deyðaslætt, og harvið kendist tað sum avbjóðing hjá óroyndu manningunum, men tað var týðuligt, at longu nú eru manningarnar meiri royndar í at leggja til startin og at rógva, enn tær hava verið fyrr í ár.
Fyrireikingarnar vóru fyrimyndarligar. Tað gekk skjótt og væl at leggja bátarnar, tað var ongantíð neyðugt við umstarti, og samlaða róðrartíðin var so stutt, sum tað bara ber til at vóna, at hon kann vera.
At lotið var undan bar møguleika við sær fyri, at met kundu verða sett. Í einum føri var talan um mettíð. Tað var í kappingini millum 6-mannafør við monnum. Páll Fangi róði skjótari, enn nakað 6-mannafar við monnum nakrantíð hevur róð á Eystanstevnu.
Tá ið talan er um tíðir og met í kappróðri, so skal alt takast við stórum fyrivarni, men í fleiri kappingum vóru tíðirnar betri, enn tær hava verið seinastu árini.
Nú bíðar Jóansøkan. Í Vági verður bara kappast á 1000 metra málinum. Tá kann tað vera, at okkurt fer at síggja øðrvísi út, enn tað higartil hevur gjørt. Í barnaróðrinum hava vinnararnir verið teir somu allar tríggjar ferðirnar. Í hinum kappingunum hevur tað í trimum kappingum verið soleiðis, at sami bátur hevur vunnið allar tríggjar ferðirnar. 6-mannaførini Sølmundur við kvinnum og Páll Fangi við monnum og 8-mannafarið Kvívíkingur hava vunnið allar tríggjar ferðirnar.
Á Eystanstevnu var ein nýggjur vinnari. Tað var í kappingini millum 5-mannaførini við gentum, har Beinta úr Miðvági var fyrst á mál. Hetta er einasta kappingin, har tað hava verið tríggir ymiskir vinnarar í teimum trimum kappingunum, sum higartil eru avgreiddar.
