»Sambandsformaður á vandakós
Fráboðanir í løgmansrøðuni um Ríkisfelagsskapin stríða grundleggjandi ímóti tí, sum Sambandsflokkurin eigur at standa fyri
Tað mundi koma óvart á tey flestu, at formaður Sambandsfloksins í ólavsøkurøðuni boðaði frá, at nú skal farast frá Ríkisfelagsskapiønum til ein ríkjafelagsskap, har ið Føroyar skulu vera sjálvstøðugt land.
Eisini kom tað óvæntað, at ein røð av yvirtøkum skal fremjast.
Fráboðanirnar um ríkisrættarligu støðuna og yvirtøkurnar eru ongantíð viðgjørdar í Sambandsflokkinum og kunnu tí ikki fatast sum politikkur floksins.
Hetta at loysa Føroyar úr Ríkisfelagsskapinum er heldur ikki í tráð við tað, sum Sambandsflokkurin eigur at standa fyri.
Vit standa yvir fyri stórum avbjóðingum í einum heimi í stórari broyting, har ið vælferðarskipanirnar, sum vit kenna tær í dag, eru undir stórum trýsti.
Neyðugt er altíð at gera tillagingar og hugsað av nýggjum, men vit eiga at útbyggja verandi ríkisfelagsskap og gera brúk av verandi møguleikum heldur enn at renna aftan á loysingarflokkunum.
Tað er altíð gott at verða semjusøkjandi, men tað skal ikki ganga ímóti grundsjónarmiðunum hjá Sambandsflokkinum. Føroyar hava frammanundan nóg mikið av loysingarflokkum, og brúk er ikki fyri einum loysingarflokki afturat. Tvørturímóti er ongantíð meira brúk fyri einum røttum Sambandsflokki enn nú.
Sambandsflokkurin vil varðveita vælferðina og teir møguleikar, sum eru við einum tøttum sambandi í Ríkisfelagsskapinum. Tað er mín sannføring, at vit við møguleikunum í Ríkisfelagsskapurin eru betur før fyri at varðveita okkara vælferðarskipanir og taka ímóti teimum avbjóðingum, sum heimurin í dag stendur yvir fyri.«
Orðini hjá løgmanni í ólavsøkurøðuni vóru hesi:
» – Tað verður neyðugt at skipa okkara ríkisfelagsskap av nýggjum. Eg droymi um ein ríkjafelagsskap við trimum sjálvstøðugum londum.
– Mín framtíðarmynd er, at vit sum fólk finna saman um eina nýggja skipan, sum sameinir heldur enn spjaðir okkum.«
