ÍBV vann ein góðan 2-1 útisigur ímóti Víkingi Reykjavík fyrr í kvøld í fjórðingsfinaluni í íslendsku steypakappingini.
Kaj Leo í Bartalsstovu og Jónas Tór Næs vóru við frá byrjan í góða sigrinum hjá eyjamonnum. Kaj Leo í Bartalsstovu fekk sær eisini eitt gult kort tíðliga í dystinum, og hann hevði eisini nakrar royndir á málið hjá Víkingi Reykjavík.
Víkingur Reykjavík kom á odda tá 24 minuttir vóru leiktir av dystinum. Tólv minuttir seinni javnaði Álvaro Montejo fyri eyjamenn. Stóra hetjan hjá ÌBV gjørdist Arnór Gauti Ragnarsson, sum skoraði sigursmálið fyri eyjamenn, tá bert tríggir minuttir vóru eftir av vanligu leiktíðini.
Tað gleðiliga er, at eisini liðið hjá Gunnari Nielsen, FH eru víðari til hálvfinalurnar í íslendsku steypakappingini. Farna hóskvøld vunnu hafnfirðingar 1-0 á Fylkir á útivølli.
Hálvfinalurnar verða leiktar 27. og 28. juli, og steypafinalan verður leikt á Laugardalsvøllinum, leygardagin 12. august.
Hevði verið stuttligt, sæð við føroyskum brillum, um ÍBV og FH høvdu møtst í steypafinaluni.
