Fyri at fáa meiriluta, skulu tríggjar atkvøður til afturat. Bæði løgmaður og Høgni Hoydal hava meira ella minni avskrivað makrelsamgonguna millum Sambandsflokkin, Javnaðarflokkin og Tjóðveldi, so tann møguleikan kunnu vit lata liggja. Men saman við Framsókn og Sjálvstýrisflokkinum fæst ein meiriluti aftan fyri Kaj Leo Johannesen sum løgmann. Hetta kundi verið ein samgonga við seks aðalráðum, har Sambandsflokkurin hevur løgmann og ein landsstýrissess, har Javnaðarflokkurin hevur tveir landsstýrisessin, og har Framsókn og Sjálvstýrisflokkurin hava hvør sín.
Hin eyðsýndi møguleikin er, at fullveldissamgongan frá 2002 verður endurskipað millum Fólkaflokkin við átta tingsessum, Tjóðveldi við seks tingfólkum, Miðflokkinum við tveimum tingfólkum og Sjálvstýri við einum tingfólki. Hetta gevur eisini tilsamans 17.
Hendan samgongan er lítið sannlík. Partvís tí, at fullveldisætlanin er slept sum politiskt mál. Sjálvt Tjóðveldi hevur so at siga lagt hesa ætlan vil viks. Hin møguleikin er, at Fólkaflokkurin og Tjóðveldi hava fá politisk mál, sum teir draga í felag. Eyðsýndasta andsøgnin er fiskivinnupolitikkurin.
Javnaðarflokkurin fer valla heldur saman við Fólkaflokkinum av somu orsøk sum Tjóðveldi. Og Javnaðarflokkurin hevur helst brúk fyri at fáa luft fyri Fólkaflokkinum eina tíð, tó at hesir flokkar hava framt nøkur hjartamál hjá Javnaðarflokkinum, eitt nú Arbeiðsloysisskipanina og Samhaldsfasta.
Triðið møguleikin er borgarliga samgongan millum Sambandsflokkin, Fólkaflokkin og Sjálvstýrisflokkin. Hendan var seinast roynd undir Paula Ellefsen frá 1981-85.
Einki er liðugt fyrr enn alt er liðugt, og mangt kann broytast næsta hálvt annað samdøgrið. Hóast pena framgongd, so hevur Sambandsflokkurin stóra afturgongd í mun til seinastu veljarakanningarnar. Í 2004 mista Sambandsflokkurin á stokkinum og vendi framgongd til afturgongd. Javnaðarflokkurin hevur hinvegin vunnið alt tað tapta í veljarakanningunum innaftur. Men heldur hendan støðan, so er mest sannlíkt, at Kaj Leo Johannesen og Aksel Johannesen sleppa sær undan einum formansumfari og leggja helst nógv fyri at útvega sitandi samgongu meiriluta.
