Málið byrjaði við einum veggmálningi á Birkerød Station, sum Jens Jørgen Thorsen hevði málað av Jesusi, sum Arne Melchior helt vera sera niðrandi. Ráðharrin gjørdi tí av, at málningurin skuldi burtur, og av hesum stóðst mikið kjak.
Arne Melchior verður spinnandi fornermaður, tá hann í Politiken fær eina speiska viðmerking frá høvundanum Carsten Jensen – so fornermaður verður hann, at hann sigur upp øll haldini, sum Ferðslumálaráðið hevur upp á Politiken.
Í Danmark eins og í øðrum londum er ikki pláss fyri politikarum, sum taka sín egna persón og egin áhugamál framum í politikki, og tí fekk Arne Melchior greið boð frá Fólkatingsins umboðsmanni um versgóður at tekna øll haldini av Politiken aftur, sum hann í persónligum fornermilsi hevði strikað.
Ráðharrin ger sjálvandi sum umboðsmaðurin sigur, og tí varð revsingin av Politiken avtikin aftur.
Hendan søgan líkist ikki sørt søguni um løgmann – ráðharran hjá fjølmiðlunum – sum í persónligum fornermilsi fríggjadagin fekk Løgmansskrivstovuna at siga haldið upp av Sosialinum, soleiðis at hann ikki persónliga fær blaðið.
