Vilmund Jacobsen
– Tá vit lata henda nýggja partin upp í morgin við kondittaríi, verður gangandi millum kafe’ina og kondittaríið.
Hon sigur, at í nýggju hølunum eru 30 nýggj sitipláss, og her hava vit okkara egna kondittarí.
– Vit hava fingið nógvar áheitanir um at selja heimabakaðar køkur, og nú fara vit eisini at selja køkur út úr húsinum, eitt nú veitslukøkur til brúdleyp, konfirmatiónir, barnadópar og annað.
Lis sigur, at talan er ikki um, at Kaffihúsið hevur bakarí í orðsins rætta týdningi, sum fer at baka rugbreyð, wienarbreyð og slíkt.
– Men, vit hava ovn og alt, sum hoyrir til eitt kondittarí. Vit fara soleiðis eisini at gera køkuna, sum gamla Kondittaríið var so kent fyri, og her hava vit fingið uppskriftina frá Heina Restorff. Men, hetta verður bert ein av mongum, leggur hon aftrat.
Tá nýggja kondittaríið hjá Kaffihúsinum letur upp í morgin klokkan 13, fer Jens Marni Hansen at undirhalda í tímanum millum klokkan 14 og 15.
– Opið verður í morgin til klokkan 18, og øll eru hjartaliga vælkomin at síggja kondittaríið og nýggju og snotuligu hølini, sum nú eru partur av okkara virksemi, sigur Lis Eklund í Niðristovu.
