Skiparin, 34 ára gamli Angus Cumming, er ákærdur fyri brot á lógina um vinnuligan fiskiskap og fyri brot á kunngerðina viðvíkjandi fiskiskapi hjá ES-skipum í føroyskum sjógvi.
Hann skal í fyrsta lagi ikki hava boðað frá eftir galdandi reglum, at hann var komin í føroyskan sjógv. Í øðrum lagi er hann ákærdur fyri at hava trolað á eini leið vestanfyri Mykines, ið er stongd alt árið.
Skiparin noktar seg sekan í øllum ákærum. Hann sigur, at hann royndi at senda eitt telex til Fiskiveiðueftirlitið, tá hann fór um markið, og at tey 1.000 pundini av fiski í lastini eru fingin í ES-sjógvi.
Fiskifrøðingar, sum vóru umborð, mettu tó, at fiskurin var nýfiskaður. Harumframt hava menn á línubátinum Sigmundi sæð Maranatha hava trolið úti á stongdu leiðini.
Ákærin krevur, at skiparin fær bót, og at hald verður lagt á veiðu og fiskireiðskap fyri tilsamans knappar 300.000 krónur.
Tá blaðið fór til prentingar hósdagin, hevði dómarin ikki tikið støðu í málinum.
