Kári P. Højgaard segði, at »veljarakanningar skulu ikki takast fyri meira enn tær eru«.
Og so vísir fremsti maður í gamla Sjálvstýrinum á, at Sambandsflokkurin, sum er størsti flokkur í veljarakanningini, fær bara ein býráðslim í Havn og ongan í Klaksvík.
Tilvitað ella ikki, so letst Kári, sum um hann ikki sjálvur dugir at lesa veljarakanningar. Tríggjar veljarakanningar eru gjørdar um býráðsvalið í Havn og tvær um býráðsvalið í Klaksvík. Um somu tíð er ein veljarakanning gjørd til løgtingið.
Felags fyri allar veljarakanningarnar í Havn var, at tær góvu Sjálvstýrisflokkinum millum 1% og 2%. Á valinum fekk Sjálvstýrisflokkurin í Havn 1,87%. Ein sera beinrakin veljarakanning, um man kann siga so.
Sama kanning gav Sambandsflokkinum millum 9,8% og 11%. Sambandsflokkurin fekk 10,15%.
Valsigurin hjá Sjálvstýrisflokkinum í Klaksvík var eisini fult í tráð við veljarakanningarnar í Klaksvík, og semja man vera um, at hesin sigur einki hevur við landspolitikkin hjá Kára Post at gera.
Kári hevur helst rætt í, at góða úrslitið í Klaksvík fer at síggjast aftur á løgtingsvalinum. Tað verður uttan iva orsøkin til, at Sjálvstýrisflokkurin ikki fer í søguna á næsta løgtingsvali, at flokkurin hevur ein sprelskan borgarstjóra í Klaksvík. Annars tala veljarakanningarnar sín dapra spádóm...
Kári sigur sjálvur, at Sjálvstýrisflokkurin ber prísin fyri tiltøk, sum samgongan hevur sett í verk og sum ikki hava verið so væl dámd.
Kanska deyðin hevur sína orsøk...?
