KÍF skal hótta fjórða plássið í kvøld

Okkaradeildin:

Klokkan 20.00: KÍF - Team Klaksvík, Ítrottarhøllin í Kollafirði

Bæði kollfirðingar og klaksvíkingar kunnu fara í jólafrí í kvøld eftir dystin í Kollafirði klokkan 20.00

Fyri Team Klaksvík hevði tað verið vorið sum jólagáva at fingið kappingarársins fyrstu stig, og vónirnar kunnu hugsast at vera á eini leið, tí fyri tveimum mánaðum síðani vann KÍF bert við tveimum málum í Klaksvík. Hetta er tað tættasti munurin, sum Team Klaksvík hevur at vísa á í ár.

Eftir dystin í Klaksvík gekk onki serligt hjá KÍF. sum tapti næstu fýra dystirnar á rað og datt burtur úr topp-4 stríðnum.

Men seinasta vikuskiftið bragdaði hjá kollfirðingum, sum gjørdist fyrsta liðið at vinna á StÍF á Skála.

Seks dystir resta í av grundspælinum, og tað er ikki ov seint hjá KÍF, sum kann minka um munin til StÍF og VÍF niður í ávikavist tvey og eitt stig.'

Júst StÍF og VÍF dystast á Skála leygardagin, so við einum sigri í kvøld kann KÍF halda jól og spæla steypakapping við vissu um, at topp-4 er gjørligt áðrenn seinastu fimm dystirnar í vár.

Sí innanhýsis dystir niðanfyri stigatalvuna

 Støðan í Okkaradeildini (hsf.fo)