KÍF setti propp fyri klaksvíkingum

KÍF vann lættan sigur á Team Klaksvík í Okkaradeildini kvøld við úrslitinum 27-15.

Við einum sigri kundi KÍF leggja seg ávikavist eitt og tvey stig aftanfyri VÍF og StÍF á avgerandi fjórða plássinum.

Sí eisini:

KÍF skal hótta fjórða plássið í kvøld

Men tað gekk onki serligt hjá KÍF fyrstu løtuna. KÍF hevði ikki Hans Eli Sigurbjørnsson á liðnum í dag og hevði ikki lætt við at fáa mál.
Ludvík Súnason legði Team Klaksvík á odda 3-2 eftir at átta minuttir vóru farnir, men so settu kollfirðingar propp í.

Team Klaksvík fekk bert eittans mál restina av hálvleikinum, og í steðginum var dysturin helst avgjørdur við støðuni 13-4 til KÍF.

Tað gekk betri við málskjótingini hjá klaksvíkingum í seinna hálvleiki, men spenningur kom ongantíð í dystin, sum KÍF vann 27-15.

Sostatt kunnu kollfirðingar fara í jólafrí við einum stigi upp til VÍF og tveimum til StÍF í stríðnum um hvør liggur á teimum fýra fremstu plássunum eftir 18 dystir.

StÍF og VÍF spæla á Skála leygardagin, samstundis sum H71 og Neistin bresta saman í Hoyvík.

Sí stigatalvu niðanfyri málskjúttarnar

Støðan í Okkaradeildini (hsf.fo)