Ein seinasti og sera spennandi flogbóltsdystur í bólkaspælinum í steypakappingini hjá kvinnum varð spældur í kvøld, tá ið KÍF og Ternan dystaðust um seinasta hálvfinaluplássið.
Fleyr hevði longu tryggjað sær 1. plássið í bólkinum, men øll hini trý liðini kundu fáa 2. plássið. Vann KÍF, komu tær víðari, men vann Ternan 3-0 ella 3-1, komu tær víðari. Vann Ternan 3-2, so kom Dráttur víðari.
Tá ið alt avtornaði í høllini í Kollafirði í kvøld, vísti tað seg, at tað verður KÍF, sum fer víðari til hálvfinalurnar. Tær vunnu nevniliga dystin 3-1. Settúrslitini vóru 25-7, 25-22, 20-25, 25-22.
Hálvfinalurnar verða spældar 11. februar í høllini á Hálsi í Havn. Tá dystast SÍ - KÍF og Fleyr - TB.
